2004 оны Олон улсын музейн зөвлөлийн Ерөнхий чуулган “Музей ба Соёлын биет бус өв” уриан дор хуралдаж “Музей нь соёлын биет бус өвийг хадгалан хамгаалах, түгээн сурталчлах, албан бус сургалтын төв байна” гэсэн уриалгыг гаргасан. Тайз дэлгэцийн өвийг судлан, хадгалж, хамгаалдаг тус музей нь Монгол улсаас ЮНЕСКО-д бүртгүүлсэн Соёлын биет бус өвийг түгээн сурталчлах, өвлүүлэн уламжлуулахад анхаарч ажиллаж байна.

Монголын театрын музей нь 2019 оноос Монгол угсаатны хөгжмийн товчоо, соёлын биет бус өвийг өвлөсөн билэг авьяастны “Алтай” хамтлагтай хамтран аялал жуулчлалын шинэ бүтээгдэхүүнийг гадаад, дотоодын жуулчдад толилуулж, хүүхэд, өсвөр үеийнхэнд түүх, өв соёлыг язгуур урлагаар таниулах “Агуйд амилсан өв” тайлбарт тоглолтоор үйлчилж байна.